DAVAO REGION- Nahimong emosyonal ang usa ka atleta nga representante sa Davao Region alang sa Palarong Pambansa 2024 nga si Carla Neisz Luardo human niini maangkon ang silver medal alang sa 400m run sa athletics.
Pagbutyag niini nga gisayangan siya sa maong panghitabo tungod atol sa maong dula, wala niini nabantayan nga aduna diay nagsunod niya nga atleta nga miapas ug naapsan siya hinungdan nga mitapos siya sa ikaduhang pwesto.
Ang maong atleta ang usa sa proud nga nagrepresent sa Davao Region alang sa Palarong Pambansa 2024 nga ginakahitabo karon sa Cebu City.
Gikumpirma usab pinaagi sa post sa social media sa tigpamaba sa Department of Education XI nga si Jenielito ‘Dodong’ Atillo nga kagahapong adlawa, ang rehiyon onse ang nakadaug og dugang 2 ka gold medal alang sa swimming, 1 ka silver medal nga mao ang nadaugan ni Carla sa athletics, 2 ka bronze medals alang sa athletics ug usa ka bronze medal alang sa swimming.
Nagpasundayag usab ang maong tigpamaba nga ang Rehiyon XI mao ang naka angkon sa ikaduhang pwesto alang sa overall result sa 2024 National Festival of Talents nga una ng nahitabo sa syudad sa Naga, Cebu.
