Pito na ang patay sa dihang miigo ang Hurricane Beryl sa Caribbean.
Gilaumang muigo sa Jamaica ang mata sa Category 4 nga bagyo ug mag-landfall kini sa Cayman Islands, una magpadayon padulong sa Yucatan Peninsula sa Mexico. Kini ang pinakaunang bagyo nga miabot sa category 4 level ug pinakakusog nga miabot sa category 5 ning bulan sa Hulyo. Adunay gikusgon sa 220 kph ang gikusgon sa hangin sa Hurricane Beryl.
Isip pagpangandam, mideklara ug curfew gikan sa alas-6 sa gabii si Prime Minister Andrew Holness sa tibuok Jamaica ug giawhag ang mukabat sa 2.8 milyong Jamaicans nga mosunod sa evacuation order.
Samtang gipangandaman na usab sa Mexico ang bagyong Beryl nga gilaumang mo-igo sa iladong tourist hotspot nga Tulum sa syudad sa Felipe Carillo Puerto.
