Hilabihan nga nagpasalamat si Senador Sonny Angara kang Pangulong Ferdinand R. Marcos Jr. sa pagsalig nga gihatag kaniya isip bag-ong gituboy nga Sekretaryo sa Department of Education.
Sumala pa kang Angara, mapaubsanon niining gidawat ang maong responsibilidad nga gisangon sa Pangulo.
Isip bag-ong Secretary sa DepEd sumala pa niini nga iyahang pagatutukan ang pakiglambigit sa tanang sektor sa katilingban lakip na ang iyahang gipulihan nga si Vice President Sara Duterte.
Kini aron nga masiguro sumala pa nga ang matag Pilipino ang adunay access sa dekalidad nga edukasyon.
Nagtuo si Angara nga ang edukasyon ang pundasyon sa kaugmaon sa nasud, ug kini maangkon pinaagi sa hiniusang pagpaningkamot nga mahatagan ug pagtagad ang mga hagit ug pahimuslan ang mga oportunidad sa umaabot nga panahon.
Dili na sumala pa siya kahulat karong panahuna nga makigpulong kang Pangulong Marcos ug sa tibuok administrasyon nga silbihan ang mga magtutungha, ug suportahan ang mga magtutudlo, ug palig-unon ang kinatibuk-an nga kalidad sa edukasyon sa atong nasud.
Si Angara ang nakahuman ug Masters of Law sa Harvard University, nagsilbi isip senador sukad niadtong 2013 hangtod ning kasamtangan, nahimong kongresista sa Aurora sukad niadtong 2004 hangtod 2013, ug usa sa mga nagduso sa mga balaod sa edukasyon sama na lamang sa Kabalikat sa Pagtuturo Act, Excellence in Teachers Education Act, Universal Access to Quality Tertiary Education Act o Free College Law, Student Fare Discount Act, K to 12, Open Learning and Distance Education Act, Anti-Bullying Act ug daghanan pang uban.
