DAVAO CITY – Nakigtambayayong ang City Health Office ngadto sa mga nagkadaiyang mga barangay ning atoang dakbayan arun nga mas pakusgan pa ang anti-dengue campaign dinhi sa siyudad ilabi pa nga padayon gihapon ang nasinatiang mga pag-ulan dinhi sa rehiyon.
Nagpahigayon og panagtapok ang maong buhatan alayon sa pagselebrar sa National Dengue Awareness Month ning bulana diin gitambongan ang maong panagtapok sa anaa sa kapin 300 ka mga indibidwal gikan sa 34 ka mga barangay dinhi sa siyudad na pulos miyembro usab sa ilahang mga nagkadaiyang Barangay Mosquito-Borne Diseases Task Force (MBDTF).
Sumala pa ni Dr. Margie Roa Rubio, CHO Assistant Health Officer for operations nga ang maong kalihukan nagapakita sa ilahang partnership sa public and private sectors ning siyudad nga adunay susamang tumong nga mao ang pagpakgang sa sakit na dengue.
Dugang pa sa maong opisyal nga importante gayud ang maong pagmugna og mga nagkadaiyang Barangay Mosquito-Borne Disease Task Force alang na matuldukan ang pagsaka sa ihap sa mga indibidwal nga matapdan sa maong matang sa sakit.
Dugang hangyo sa maong buhatan ngadto sa publiko nga imintinar ang kalimpyohan sa ilahang mga panimalay lakip na usab ang pahimangno nga ang maong sakit dili lamang usa ka health concern kundi usa ka social concern diin responsable ang tanan.
