DAVAO DEL NORTE – Gikataho sa City Health Office- Tagum City nga sa pinaka-ulahing report sa City Epidemiology Surveillance Unit nakatala sila og 24 ka mga bag-ong kaso sa dengue gikan Hunyo 2 hangtod 8, 2024.
Ning kasamtangan, mokabat na sa 613 ang kinatibokang kaso niini sa dakbayan, sukad Enero 1 hangtod Hunyo 8 ning kasamtangang tuig diin nagpabiling anaa sa duha ang natalang nakabsan sa kinabuhi sa maong sakit.
Gani nag-una gihapon ang Barangay Visayan Village sa adunay natalang pinakadaghang kaso sa dengue nga anaa sa 96 gikan sa 91, nga gisundan sa Apokon nga anaa sa 82 gikan sa 78, ug Mankilam nga adunay 78 gikan sa 74.
Samtang sa pikas bahin, gibutyag ni Dr. Tomas Miguel Ababon Head sa City Health Office- Davao City nga padayon ang ilahang mga lakang dinhi sa siyudad alang sa pagpugong sa pagtaas sa kaso sa dengue dinhi sa dakbayan.
Busa nanawagan kini ngadto sa publiko nga mamahimong mag-igmat ingon man pirmintohon ang pagpanglimpyo sa mga panimalay ilabi na karung panahona nga opisyal ng gasugod ang wet season kon tingg-ulan.
Pahinumdom sa maong opisyal ngadto sa publiko nga ang maong matang sa sakit kay dili lamang usa ka health concern kundi usa usab kini ka social concern diin resposable ang tanang katawhan.
