Gibarugan sa Philippine National Police nga gisunod nila ang legal security protocols human nga gisilbi ang arrest warrant batok kang Kingdom of Jesus Christ leader Pastor Apollo Quiboloy ug lima pa ka mga kaubanan.
Sa usa ka pamahayag, gibutygag sa PNP nga lehitimong oprasyon ang ilahang gipahigayon ug istriktong nahisubay sa legal security protocols ug adunay pagtahod sa tanang nalambigit nga partido.
Sumala pa sa nasudnong kapulisan nga giila niini ang high-profile nature sa subject hinungdan nga nasayod ang PNP sa presensya ug saktong ihap sa kapulisan atpl sa operasyon aron nga magpabilin ang kahapsay ug malikayan ang unsa man nga panghitabo.
Nakiglambigit usab sila sa mga lokal nga opisyal aron nga masiguro ang kalinaw ug kahapsay nga pagpatuman sa ilahang operasyon.
Estrikto sab nila nga gisunod ang guidelines nga gilatag sa PNP Operational Procedures Manual nga naghatag sab sa kamahinungdanon sa baruganan sa tawhanong katungod ug pagpahigayon sa police operations nga adunay integridad.
Samtang nihangyo sab ang PNP kang Pastor Quiboloy nga nagpabiling at large karong panahuna nga motahan na ug atubangon ang mga reklamo batok kaniya.
Kahinumduman nga hugot nga gikondena ni kanhing pangulong Rodrigo Duterte ug VP Sara Duterte ang sobra sumala pa nga mga pwersa sa kapulisan atol sa pagsilbi sa arrest warrant kang Pastor Quiboloy.
