Giaprubahan sa Davao City Council ang ordinansa nga nagsaulog sa Mayo 3 isip “Davao City Liberation Day,” nga usa ka working holiday.
Sumala ni Councilor Pilar Braga, nagtumong ang ordinansa sa pagsilsil sa importansya sa mga Dabawenyo bahin sa pagkalingkawas sa lokalidad gikan sa mga Hapones.
Maghimo ang kagamhanang lokal sa dakbayan og tinuig nga commemorative program, nga makigtambayayong sa nagkalain-laing organisasyon, lakip ang Philippine Veterans Affairs Office, Armed Forces of the Philippines, Philippine National Police, Veterans Federation of the Philippines, Davao Historical Society, ug mga pamilya sa mga beterano.
Mopahigayon ang militar og ceremonial firing ug wreath laying sa “Tomb of the Unknown Soldier,” usa ka lubnganan nga gimarkahan og puti nga krus nga gitabonan sa Japanese nga bamboo nga nahimutang sa Madapo hills ning dakbayan.
Ang mga bandera sa Pilipinas igabutang sa matag institusyon sa gobyerno atol sa paghandum. Gitumong sab sa maong ordinansa ang pagpahihumdum sa nabag-o nga paglantaw sa patriyotismo, kagawasan, kalinaw, ug gugma sa nasod taliwala sa mga katawhan, ilabina sa mga kabatan-onan.
Ang working holiday subay sa Proclamation Order No. 653, Series of 1993 nga gipirmahan ni kanhi Presidente Fidel V. Ramos.
