DAVAO CITY – Manukad na karong adlawa, Hunyo 1, ang pagpahigayon og clearing operations palibot sa Bankerohan Public Market ning dakbayan alang sa ipatumang “1/3-2/3” policy.
Mismong mga opisyales na sa Barangay 5-A ug mga sakop sa Davao City Transport and Traffic Management Office (CTTMO), ug Ancillary Services Unit ang nagtanggal, naglangkat, ug nagpahawan sa mga obstructions nga milaray sa mga dalan sa Bankerohan.
Kompiskahon na sa ASU ang mga produkto sa mga market vendors selling nga mamaligya pa gihapon daplin sa dalan. Kalakip sab sa tangtangon ang mga nakababag sa dalan sa mga tricycles og mobile stalls.
Subling nagpahinumumdom si CTTMO Head Dionisio Abude nga 24 nang mag-monitor ang mga sakop sa CTTMO aron mahatagan na og hawan og hayag nga dalan ang mga muagi nga sakyanan paingon ug pagawas sa palengke.
Samtang gikatakda sab nga mabalhin sa Rasay Street ang mga manindahay sa Posadas Street nga himoon na karong pay parking.
Una na sab gikanayon sa opisyal nga dunay 406 ka mga bakanteng pwesto ang mamahimog pagapundohan sa mga apektadong vendors sa Bankerohan.
Samtang implemetahon sab ang bag-ong traffic scheme diin mahilakip ang re-routing sa 11 ka mga Public Utility Jeepneys (PUJs).
Gibarugan sab sa ahensya nga wala nay extenstion nga gihatag sa mga vendors human sa 2 ka bulan nga palugit kanila.
Gihatagan og gibug-aton sa buhatan ang panginahanglan sa pagpadali niini nga proseso aron mamenosan ang kahuot sa mga tigbaligya, business owners, drayber, ug mga vendor.
Sa pikas bahin, namahayag si Davao City Mayor Sebastian Duterte hmahitungod sa mamahimong kahimtang sa mga ambulant vendors human sa mahitabong pagpahawa kanila sa ilahang mga pwesto sa Bankerohan.
Sumala sa mayor nga nangita og pamaagi ang lokal nga panggamhanan aron mabalanse ang panginabuhian sa mga anaa sa sulod ug gawas sa merkado.
