DAVAO CITY – Gikabutyag sa Police Regional Office 11 nga ang gipakanaog nga administrative relief ngadto sa 35 ka mga opisyal ug personnel gikan sa Davao City Police Office ang nahisubay sa rekomendasyon sa Regional Internal Affairs Service 11.
Sumala sa tigpamaba sa PRO 11 nga si PMAJ. Catherine dela Rey, gibase ang maong pag-relieve sa daghanang mga sakop sa DCPO sa procedural due process, pagsiguro sa transparency ug accountability sa mga public officers. Dugang pa nga gihimo ang desisyon sa pag-relieve sa mga pulis uban sa bug-os nga deliberasyon ug pagkonsiderar sa tanang kamatuoran ug sa palibot nga mga sirkumstansya.
Hinuon, mipasalig ang PRO XI ug PNP Internal Affairs Service sa publiko nga mamahimong patas ang imbestigasyon diin kung makit-an ang non-culpability sa maong opisyal, mamahimo matud pa silang ibalik sa PRO sa ilang mga naunang mga katungdanan.
Sa pikas bahin, namahayag si Davao City Mayor Sebastian Duterte mahitungod sa pagpalag sa nahitabong pagpatanggal sa katungdanan sa mga opisyal sa DCPO human sa deklarasyon sa war on drugs nga kahinumdumang nakakutlo og pito ka gidudahang tulak sa ilegal nga droga sa dakbayan niadtong Marso.
Sumala sa mayor, abli kini sa pagpahigayon og imbestigasyon mahitungod niini. Apan iyang gikwestyon ang sumala pa pagtutok sa kaswalidad sa maong kamanduan nga gisudgdan sa iyang amahan nga si kanhi Pangulo ug Davao City Mayor Rodrigo Duterte.
via || Bombo LJF
