DAVAO ORIENTAL – Malipayon nga giablihan pag-usab sa lokal nga panggamhanan sa Davao Oriental ang grandyosong Aliwagwag Falls Eco-Park human sa upat ka tuig nga pagkakordon niini ngadto sa publiko.
Sumala ni Gobernador Niño Uy, usa kini ka tribute alang sa nitaliwan nga gobernadora sa probinsya nga si Corazon Malanyaon nga nagpasiugda sa development sa eco-park kaniadtong 2016.
Dugang pa nga gihatagan niya og dakong mando ang mga hingtungdan nga departamento, ilabina sa Provincial Tourism Office, aron mapadali ang groundworks.
Dagkong kahigayonan sab kini sa probinsya nga mapauswag pag-usab ang industriya sa turismo sa probinsiya aron mapalambo ang panginabuhian sa mga residente ug makapadasig sa lokal nga ekonomiya, ingon usab ang panginahanglan sa pagpanalipod ug pagkonserbar sa natural nga kabilin sa probinsya alang sa umaabot nga mga henerasyon.
Adunay mga gidungag nga mga pasilidad ang bag-ong nature park sama sa A-frame houses, tourist cabins, food court, function hall, ug hanging bridge aron mamenosan ang paghuot sa tulay nga gigamit kaniadto sa mga turista sa pagkuha mga hulagway.
Kahinumduman nga gisirad-an ngadto sa publiko ang Aliwagwag Falls niadtong panahon pa sa pandemya aron mahatagan og agianan ang rehabilitation sa maong dapit.
Giila ang Aliwagwag Falls isip pinakahataas nga waterfall sa Mindanao ug sa tibuok Pilipinas nga dunay 1,110 feet ang gitas-on nga natural nga nahulma nga daw sama sa hagdanan.
Sumala pa sa lokal nga sugilanon, usa ka gasa gikan sa mga diyos kini nga busay ngadto sa Mandaya nga tribo sa Cateel.
Giisip kini sa tribo nga tinubdan sa ilang panginabuhi ug tuburan sa kinabuhi.
