DAVAO DEL SUR – Nangalanag sa gisumsuman nga butete kon puffer fish ang usa ka pamilya sa Brgy. Astorga, Sta. Cruz, Davao del Sur.
Giila ang mga biktima nga sila si Rolando Maruken, usa ka amahan nga 59 anyos; Russel Marken, 36 anyos niyang anak; ug ang kapuyo sa anak nga si Antoinette Ulibo, nga pulos nagpuyo sa Soriano Brgy Astorga, Sta. Cruz, Davao del Sur.
Sa pakighinabi sa Bombo Radyo Davao kang Rolando, nakuha nya ang butete sa iyang pag pamasol nga dunay dos kilos ang gibugaton ug dayon kining gilimpyohan, giluto, ug gisud-an sa panihapon.
Pagkabuntag niana dihang nakasinati sab og panglipong ug pamuypoy sa lutahan hinundan dali sila nalahos sa Davao Del Sur Province Hospital.
Gawas sa tulo ka indibidwal, nalanag sab sa gikaong butete ang duha ka iring ug binuhing manok.
Sa karon padayon pa nga ginaobserbahan ang kahimtang sa mga biktima ug ginaimbistigahan pa sab ang kabahin sa maong panghitabo.
Nasayran nga adunay toxic chemicals ang bahin sa maong isda nga gitawag ug ‘Tetrodotoxin’. Apan adunay pipila ka mga indibidwal ang makabalo mohinlo niini nga dili sila mahilo.
Sa pagkakaron nagpahimangno ang mga eksperto nga dili magkonsumo sa maong isda kung kulang sa kahibalo sa paghinlo niini.
