-- ADVERTISEMENT --
DAVAO CITY- Gipahayag ni Tagum City Mayor Rey Uy human sa nahitabong pagdungog sa House Committee on Ethics kagahapong adlawa nga ginalauman niining “force expulsion” ang mamahimong resulta mahitungod sa gipasaka niining reklamo batok kay kanhi House Speaker ug Davao del Norte 1st district Rep. Pantaleon Alvarez. Kahinumdumang si Alvarez ang nag-atubang karon og pagdungog mahitungod sa mga pasangil nga paglapas niini sa code of conduct, disorderly behavior, ug uban pang balaod.
Lakip sa mga pasangil batok kaniya mao ang “libelous remarks” niini ngadto sa mga opisyal sa Davao del Norte; “habitual absences” o pagkapakyas sa pagsulod sa Kamara; ug ang iyang giingong “seditious statements” batok kang Pang. Ferdinand Marcos Jr. partikular na ang pag-awhag sa militar ug kapulisan nga bawion ang suporta sa pangulo.
Sumala pa ni Mayor Rey Uy nga sobra na ang nahimong pamahayag ni Alvarez ug dili kini ang aksyon sa usa ka opisyal.
Matud pa niini nga dili kinahanglang gamiton ang “freedom of speech” aron maingon ang maskin unsa na lamang batok sa kapwa opisyal. Sigon niini nga dili absolute ang freedom og speech maong aduna usab kitay balaod mahitungod sa libel.
Dugang pa ni Mayor Uy nga desisyon gayud niini nga magpasaka og reklamo batok kay Alvarez ug walay midikta kaniya nga ireklamo kini sa Ethics Committee.
Kahinumdumang sa wala pa ang pagsang-at sa ethics complaint batok kaniya, gipanghimakak ni Alvarez ang paghimo og mga seditious nga mga pulong, nga nag-ingon nga nanawagan lamang siya sa usa ka malinawon nga pag-atras sa suporta gikan sa Presidente.
Miingon usab si Alvarez nga dili seditious ang iyang panawagan alang sa pagbulag sa Mindanao gikan sa Pilipinas.
via || DMA
