DAVAO CITY – Lauman ang hugot nga seguridad nga ipatuman sa mga safety and security personnel sa tibuok Davao Region alang sa paghinumdom sa Kwaresma.
Sumala ni Police Major Catherine Dela Rey, ang tigpamaba sa Police Regional Office 11 nga anaa sa 3,000 ka mga police personnel ang ipakatag karong Semana Santa partikular na sa mga terminal, pantalan ug airport diin lauman ang pagdagsang sa daghanang mga bisita sa rehiyon.
Gawas niana, dugang seguridad sab gikan sa kapulisan ang ipakatag sa mga nag-unang tourist destinations sa rehiyon partikular na sa mga baybayon, aron masiguro ang kaluwasan sa mga bisita karong long holiday.
Gipasalig sab sa PRO 11 nga magbutang ug dugang mga personahe ang mga police units sa tibuok rehiyon sa mga simbahan aron motabang ug magbantay sa kaluwasan sa mga deboto nga motambong sa Santos nga Misa.
Samtang dinhi sa Davao City, gipasalig sab sa Task Force Davao ang igong ihap sa mga personahe sa kasundaluhan nga magbantay sa mga entry checkpoints sa dakbayan alang sa Holy Week, Ramadan ug ang naghinapit nga Davao Regional Athletics Association kon DAVRAA Meet diin mag-host sa maong sporting event ang Davao City.
Sumala kang Task Force Davao Spokesperson Capt. John Louie Dema-ala sa eksklusibong pakighinabi sa Bombo Radyo Davao, hugtanon gihapon ang ilusad nga mga checkpoints ingon man ang pagpasusi sa mga kagamitan sama sa non-transparent nga sudlanan, jacket ug backpack nga sagad ginagamit sa mga terorista.
Nagpahinumdom sab si Dema-ala ngadto sa mga Dabawenyo nga ipatuman ang Culture of Security nga “kung may makita, dapat magsalita.”
