DAVAO CITY – “No show” kagahapon si kanhi Davao City Mayor ug Former President Rodrigo Duterte atol sa Datu Bago Awards 2024 nga gipahigayon dinhi sa dakabayan.
Inay ang kanhi pangulo, si Davao City Vice Mayor J. Melchor Quitain Jr. ang nagdawat sa maong pasidungog kang Digong isip labing nag-inusarang awardee nga nag-ila sa mga outstanding Dabawenyos.
Kahinumduman nga gibutyag ni City Councilor Pilar Braga nga ilang gisuspinde una ang pagdawat ug nominasyon isip paghatag og agianan alang sa kanhi pangulo isip sole awardee sa maong award.
Rason nga gihatag mao ang nahimong legasiya sa kanhi mayor sa pag-uswag sa Davao City sulod lamang sa pito ka termino ug 21 ka tuig, ilabi na sa culture of unity, resilience, and progress nga nagseguro nga walay laing mabiyaan nga Dabawenyo.
Dugang pa ni Konsehal Braga, panahon na matud pa aron ipaabot ang pagpasalamat sa mga Dabawenyo alang kang Digong.
Apan gikwestyon sa mga civil groups lakip ordinaryong Dabawenyo ang maong paghatag og pasidungog sa kanhi pangulo nga nadungan sab sa pag-ulbo ug paghalungkat sa mga isyu sama sa pagkumpormiso sa soberanya sa nasud alang sa panaghigala niini sa China panahon sa iyang pagpangatundanan isip pangulo, lakip na ang pag-atubang niini sa International Criminal Court nunot sa nahitabong extra judicial killings sulod ug gawas sa dakbayan.
Gipunting sab nila ang suod nga panaghigalaay nila ni KOJC leader Pastor Apollo Qubuloy nga nasantop sa pagtuboy kaniya isip property administrator.
Kasamtangang anaa sa kaulohan ang kanhi pangulo alang sa pagsipot sa rally nga gipangulohan sa mga supporters ni Quibuloy.
