DAVAO CITY – Malipayong gipaambit sa lokal nga panggamhanan sa Davao de Oro nga giaprubahan na sa Sangguniang Panlalawigan ang paghatag og pagtugot kang Governor Dorothy Gonzaga nga gamiton ang financial assistance nga gihatag sa Office of the President alang sa mga biktima sa kalamidad sa tibuok probinsya.
Gikumpirma mismo ni Davao de Oro 1st District Representative Ruel Peter Gonzaga nga nagpahigayon og special session ang Sangguniang Panlalawigan kaniadto diin gituki ang nasangpit nga resolusyon. Matod ni Gonzaga, gamiton ang maong pundo sa nagkadaiyang ayuda sa mga biktima sa sunod-sunod nga kalamidad nga miigo sa probinsiya lakip na ang food assistance, kapuy-an, pasilidad sa evacuation centers ug financial assistance.
Kahinumduman nga gitunol ni Pres. Ferdinand Marcos Jr. ang tseke ngadto kang Gov. Gonzaga atol sa situation briefing nga gipahigayon niadtong Pebrero 7 sa Davao City, nga nagkantidad og P30M alang sa mga residente nga apektado sa shear line ug low pressure area, ug kini gipasaka niadtong Pebrero 16 og P10M alang sa mga biktima sa linog nga nahitabo niadtong Disyembre 2023.
Mikomento lang ang kongresista nga taas kaayo ang usa ka buwan aron mahatagan og otoridad ang gobernador sa probinsiya sa paggamit sa maong pundo ilabi na nga anaa na kini sa state of calamity sukad niadtong Enero 20, diin daghang mga residente ang nanginahanglan og dinaliang tabang.
Busa gihangyo niini ang Sangguniang Panlalawigan nga ipadaplin una ang politika, inay magtinabangay ilabina sa panahon sa kalamidad aron matubag dayon ang panginahanglan sa mga apektadong katawhan sa probinsya.
Sa pikas bahin, gisaulog sa probinsya ang ika-26 nga katuigan sa pagmugna sa probinsya diin nakasentro ang mga aktibidad sa paghatag og serbisyo publiko sa mga taga-Davao de Oro.
