DAVAO CITY – Gipanubayan sa DSWD 11 ang isyu mahitungod sa gikatahong kulang-kulang nga kantidad sa mga ayuda nga nadawat sa mga residente sa Davao del Norte niadtong panahon sa pagbaha sa probinsya.
Sumala ni Atty. Vanessa Goc-ong, DSWD 11 Regional Director nga bisan pa man sa temporaryo nga suspensyon sa pagpahigayon og Senate hearing, giimbestigahan sab sa bahin sa ahensya ang maong suliran subay na sab sa mando ni DSWD Secretary Rex Gatchalian.
Gikanayon ni Goc-ong nga una pa man ang hearing sa Senado, nangunay sa pagtuki ang ahensya gumikan sa dinagko nga ihap sa mga nahatagan og ayuda sa probinsya.
Nagapahigayon karon og pagpakigsayod pinaagi sa phone call ngadto sa mga benepisyaryo ingon man pag-adto sa mga payout areas.
Giangkon sa opisyal nga daghanan kanila ang nakadawat og insaktong kantidad sa ayuda, apan dunay pipila ka mga inidibidwal ang nikumpirma kanila nga gikuhaan og halos tunga sa maong kantidad sa pinanasyal nga ayuda.
Pagpaklaro pa nga walay mga empleyado gikan mismo sa DSWD 11 ang nalambigit niini, apan gituohan nga pipila ka sakop sa Municipal o Provincial Social Welfare Office ang dawit matud pa sa maong isyu.
Hinuon, wala pa kini hingpit nga nakumpirma gumikan wala pa masayri gikan mismo sa mga benepisyaryo kung si kinsa ang nagpaluyo niini.
Andam maghatag ang DSWD 11 og assistance alang sa mga dunay laraw nga magpasaka og kaso batok sa mga dunay kalambigitan niini.
Kahinumduman nga gibarugan ni Davao del Norte Vice Governor De Carlo “Oyo” Uy nga walay kamatuoran ang mga alegasyon mahitungod sa ayuda scam nga gipatutukan sab sa Senate Committee on Public Order and Dangerous Drugs dungan sab sa hangyo nga pagpa-imbestiga ni Davao del Norte Governor Edwin Jubahin.
