DAVAO CITY – Gibarugan ni Davao City Mayor Sebastian Duterte ang iyang mga pamulong batok sa kasamtangang administrasyon atol sa nahitabong Hakbang ng Maisug Prayer Rally sa Cebu diin gitawag ni Duterte ang saad sa kampanya ni Marcos nga paubsan ang presyo sa bugas ngadto sa P20 matag kilo nga “greatest scam.”
Gisaway sab sa mayor si House Speaker Martin Romualdez, ig-agaw ni Marcos, nga gitawag siya nga “maisog” bahin sa iyang mga lakang sa politika tungod lang kay ang iyang ig-agaw mao ang incumbent nga presidente.
Gihatagan og gibug-aton sa mayor ang pagdagsang sa ilegal nga droga, kriminalidad, ug korapsyon sa nasud ug nanawagan nga sulbaron kini nga mga isyu aron mapauswag ang kinabuhi sa ordinaryong mga Pilipino.
Dugang pa sa mayor, walay paglaom ang kaugmaon sa nasod kon ipadayon sa mga politiko ang ilang agenda sa “pagpatambok sa ilang mga bulsa,” nga moresulta sa mga hakog nga motibo nga magpabilin sa taas nga bahin sa katilingban.
Gibarugan sab sa mayor nga magpadayon siya sa pagserbisyo sa publiko ug pagsiguro nga ang buhis nga gibayad sa mga katawhan ug dili mapadulong sa mga kurakot nga opisyal.
Kahinumduman nga gitawag ni Interior Secretary Benjamin Abalos Jr. ang mga pamahayag ni Duterte, nga nag-ingon nga kinahanglan kanunay nga mogawi ang mga piniling opisyal subay sa dignidad sa ilang buhatan ug maghatag og ehemplo sa ilang mga ginsakupan, ilabi na sa mga kabatan-onan.
