DAVAO CITY – Hugtanon nang gitapos sa lokal nga panggamhanan sa munisipalidad sa Maco, Davao de Oro ang Search and Retrieval Operations sa nahitabong landslide sa Barangay Masara, Maco, Davao de Oro.
Pinaagi kana sa Executive Order No.17 series of 2024 nga giisyu ni Maco Mayor Arthur Carlos Voltaire Rimando nga nagsugod kagahapon. Nahisuubay sa suhestyon sa Incident Management Team ang maong pagpahunong nga nagsugod bandang alas-5 sa hapon.
Nagpasalamat ang Provincial Government sa mga rescue team, mga pampubliko ug pribadong sektor ug sa katawhan nga nahimong malig-on sa nahitabong katalagman ug gipasalig niini nga dili pasagdan ang mga apektadong residente hangtod nga makabangon sa usa sa pinakamasulub-on nga lanslide incident sa nasud.
Sa pagtapos sa mga operasyon sa ground zero, gikatala ang anaa sa 93 ka mga patayng lawas nga narekober. Diin sa maong ihap, 79 niini ang na-identify ug napahilona na sa ilang mga pamilya samtang 14 usab unidentified ug upat ang na-retrieve nga body parts.
Samtang, 8 ka mga tawo ang kumpirmadong missing human sa makakuyaw nga insidente niadtong Pebrero 6 ning tuiga.
