DAVAO CITY – Nakamugna og dagkong implikasyon sa kasamtangang estado sa pulitika sa Pilipinas ang namugnang tensyon tali Duterte ug Marcos ilabi na sa paglusad og mga managlahing mga rallies niadtong milabayng adlaw.
Sumala sa nakahinabi nga poltical analyst sa Bombo Radyo Davao nga si Niel Pancho, dunay nahitabo nga “uncoupling” o panagbulag sa duha ka kanhi magkaalyadong political entities sa nasud sukad sa pag-ulbo sa mga isyu nga may kalabutan sa pag-amyenda sa konstitusyon sa nasud.
Dugang pa niini nga naipit sa krusyal nga kahimtang si Vice President Sara Duterte gumikan sa pagkalabuay sa duha ka partido human sa pagsalmot sa Bagong Pilipinas Kickoff ni Pangulong Bongbong Marcos ug ang nahitabong One Team, One Opposition prayer rally nga gipangunahan ni Former President Rodrigo Duterte.
Gikanayon ni Pancho nga bisan pa man sa tinud-anay nga partnership ang duha ka pamilya alang sa tinguha nga “unity” sa nasud, tataw sab ang pagkuha sa pangulo ang pagtudlo og mga myembro sa gabinete nga kadaghanan niini nga iyang mga kaalyado ug dili halos gikan sa partido ni Duterte.
Gipunting sab niini ang ubay-ubay nga pagbag-o sa palisiya sa gobyerno ni Duterte ngadto sa Marcos administration.
Naghinaot sab si Pancho nga bisan pa man nga wala pa nahitabo ang gikanayong “constitutional crisis” sa nasud, dili unta mamahimong makapangilabot ang militar taliwala pa man sa panawagan ni kanhi Pangulong Duterte nga panalipdan ang konstitusyon, ug mahusay kini ka konstitusyonal nga pamaagi.
Nakita sab ni Pancho nga ang gipahigayong prayer rally sa dakbayan ang usa ka oportunidad nga bag-uhon ang hulagway sa Oposisyon pinaagi sa pagputol sa koneksyon sa duha ka partido.
Sa maong lakang, namatikdan ang kalamangan sa gidaghanon sa mga nisuporta kang Duterte kon itandi sa mga nisuporta sa kasamtangang administrasyon.
