DAVAO CITY – Naghatag og kadaot sa kinatibuk-ang 1,558 ka ektarya nga talamnan sa Davao de Oro ug Davao Oriental ang miigo sa rehiyon nga Bagyong Kabayan. Kini ang migawas sa inisyal nga taho gikan sa Department of Agriculture – Davao Region.
Gikanayon ni Joedel Leliza, ang regional disaster risk reduction and management focal person sa DA-Davao, mikabat ang maong danyos sa 892 ka ektarya sa Davao de Oro ug 665.8 ka ektarya sa Davao Oriental.
Lauman sab ang dagkong kawad-on sa local rice supply tungod sa gibanabana nga pagkawala sa 7,000 hangtod 8,000 metriko tonelada nga humay.
Dugang pa nga sa Davao de Oro, mokabat sa 1,615 ka mga mag-uuma sa humay ang naapektuhan, ug 892 ka ektarya ang nadaot nga mikabat sa P4,854,320 nga nawala sa kantidad sa pananom.
Samtang apektado sab ang 67 ka mag-uuma sa mais ug anaa sa 76 ka ektarya sa maisan nga naghatag og danyos nga P2,288,675.
Apektado sab ang ubang yutang sakahan sa Mawab, Montevista, Laak, Nabunturan, ug Compostela.
Sa Davao Oriental, wala pay nahatag nga danyos apan apektado ang anaa sa 665.8 ka ektarya sa bugas, 56.75 ektarya sa high value crops, ingon man lubi, mais, livestock ug fishpond sa Lupon, Cateel, Manay, ug Boston.
Andam ang DA-Davao sa pag-apud-apod sa buffer stock seedlings ug pag-rehabilitate sa naguba nga mga plantasyon sa humay pinaagi sa ilang mga rice programs, apan kinahanglan silang mangayo og quick response fund (QRF) para sa 2024 aron suportahan ang dugang nga rehabilitasyon.
Sa pagkakaron, ang DA-Davao adunay 3,000 ka sako sa bugas buffer stocks nga gitipigan.
Sa kinatibuk-an, anaa sa P7.1 million nga danyos sa agrikultura ang natala sa duha ka probinsya nga napahagsa ni Bagyong Kabayan.
