DAVAO CITY – Gihatod na sa ulahing kapahulayan niadtong adlawng Dominggo, Nobyembre 19, ang nahalal nga barangay kapitan sa Brgy. Datu Abdul Dadia, Panabo City nga si Engr. Paul Albert Saquian.
Gitapuk-an sa mga katawhan ang ulahing haya ni Saquian una pa siya gilubong sa Eternal Garden Memorial Park sa Panabo.
Hangtod sa ulahing higayon, hustisya gihapon ang panawagan sa nabiyaang pamilya ug kabanay ni Epong nga hangtod karon, wala nadawat ang duguon nga pagtapos sa iyang kinabuhi sa dihang napusil patay kini niadtong November 7, bandang alas-3:15 sa hapon, sa Purok Mangga, Brgy. Datu Abdul Dadia, Panabo City, Davao del Norte.
Kahinumduman nga wala na makaabot sa iyang pagpangatundanan isip bag-ong barangay kapitan sa maong lugar kini human nga nakahiagum ug daghanang samad pinusilan sa managlahing bahin sa lawas sa maong dapit.
Ning kasamtangan, nagpadayon ang gisugdan nga imbestigasyon sa kamatayon ni Saquian.
Nobyembre 15 dihang unang gipakita sa Davao del Norte Police Provincial Police ang hulagway sa duha ka mga suspetsado pinaagi sa computerized facial composite sketch sa kapulisan nga nasayran nga nagsakay og motorsiklo ug daling nakaikyas human sa krimen.
Nagtuo ang ang kapulisan nga gun for hire ang mga nahisgutang suspetsado. Nagpadayon sab ang gilusad nga hot pursuit operation aron masikop ang mga suspek.
Dunay P500,000 nga patong sa ulo ang mga suspek nga gipataw ni Panabo City Congressman Alan Dujali nga usa sa daghanang mga opisyal nga nikondena sa krimen.
via || Bombo LJF
