DAVAO CITY – Wala na makaabot sa iyang pagpangatundanan isip bag-ong barangay kapitan sa Barangay Datu Abdul Dadia, Panabo City, Davao del Norte ang usa ka lalaki nga napusilan patay sa maong dapit.
Subay sa taho sa Panabo PNP, giila ang biktimang si Engr. Paul Albert Saquian o mas giilang si Epong nga nakahiagum ug daghanang samad pinusilan sa managlahing bahin sa lawas.
Nahitabo ang maong insidente bandang alas-3:15 sa hapon, kagahapong adlawng Martes, Nobyembre 7.
Sigon sa imbestigasyon sa SOCO Team gikan Davao del Norte Provincial Forensic Unit, nipauli ang maong biktima padulong sa ilang balay gikan Barangay New Visayas gamit ang iyang sakyanan.
Apan, pag-abot niini sa Purok Mangga, kalit nga misugat kaniya ang duha ka suspetsado nga naka-motor ug diha nila gipusil patay ang biktima ug nakaikyas sa wa matinong direksyon.
Gisulayan pa og tabang ang biktima sa Rivera Hospital sa Panabo City ang biktima apan bandang alas-4:30 sa hapon dihang gideklara kining dead on arrival.
Gipakisayran pa sa mga otoridad ang motibo sa krimen samtang gipahigayon karon ang usa ka hot pursuit operation alang sa pagkasikop sa duha ka mga suspetsado.
Nagpaabot ug pahasubo ngadto sa pamilya si Congressman Alan Dujali.
Pamahayag sa kongresista nga bisan pa man politically-motivated o dili, hingpit nilang gikondena ang maong insidente.
Nagtanyag sab og reward money nga P500,000 ang kongresista sa makatudlo sa mga nakapatay sa bag-ong kapitan.
via || Bombo LJF
