DAVAO CITY – Gimugna sa Davao de Oro Police Provincial Office ang usa ka Special Investigation Task Group aron pagatutukan ang kamatayon ni Alvin Garcia nga usa ka kandidato sa pagka-Kapitan kansang napusilan patay sa wa mailhig grupo atol sa pagpangampanya sa Barangay Camantangan, Montevista, Davao de Oro niadtong Oktubre 24 sa buntag.
Ang pagtukod sa maong SITG, adunay pagpanubay ni Police Regional Office 11 Director Alden Delvo.
Gilusad kagahapon ang pinaka-labing unang case conference sa grupo diin gikabutyag nga duna nay giilang persons of interests sa pagpusil-patay sa kanhi kagawad sa barangay.
Una nang gibutyag sa imbestigasyon sa Montevista Municipal Police nga niadtong adlawa, musalmot unta sa usa ka Pulong-pulong sa kahapunon ang biktima apan samtang nangampanya, duha ka wala mailhing suspetsado nga nakasakay og motor nga walay plate number ang kalit nga niduol sa biktima ug gipusil ang nahisgutan gamit ang calibre .38 nga pistola, samtang nakasakay usab kini sa iyang motor dungan sa iyang back rider nga giilang si Jocelyn Argon, bandang alas-9 sa buntag.
Gumikan sa panghitabo, nahulog ang back rider sa biktima sa motor samtang ang mga suspek nilupad ngadto sa Barangay Canidkid. Nakigtambayayong na usab ang Montevista Police kauban ang 25th IB sa AFP ug uban pang mga law enforcement units aron mupahigayon og hot pursuit ug drag net operation.
Samtang hugot na sab ang pagpaniid sa mga otoridad sa lugar samtang nagkaduol ang adlaw sa piniliay.
Una nang gikanayon sa PRO 11 nga posibleng mahulog ang maong kaso isip election related violence.
via || Bombo LJF & Bombo HJR
