DAVAO CITY – Gipalawman sa usa ka eksperto ang nahitabo nga mass hysteria sa onse ka mga estudyante sa Digos City National High School sa Davao del Sur.
Sa ekslusibong pakighinabi sa Bombo Radyo Davao kang Christian Glomar Coronado, usa ka Theologian ug magtutudlo gikan sa Lyceum of the Philippines University – Davao, usa ka sociogenic illness ang maong panghitabo nga sumala pa, usa kini nga psychological phenomenon nga nagtakod ang hiniusang emosyon sa walay kahimutangang kabalaka gikan sa usa ka tawo ngadto sa usa ka grupo.
Sa kaso sa mga estudyante sa Digos City, silang tanan ang dungang nakasinati niini gumikan sa mga managlahing suliran sa kinabuhi.
Gipaklaro sa eksperto sa Theology nga kinahanglang ipasailawom sa tumang psychological assessment ang usa ka tawo nga posibleng na-possess kon masudlan og dautang elemento una pa man kini ipasailawom sa akto sa Exorcism, subay sab sa mga sumbanan sa Simbahang Katolika.
Dugang sab sa pakighinabi kang Coronado, dunay managlahing ang-ang sa pagsulod sa mga dautang elemento sa usa ka tawo. Una niana ang demonic obsession kon matud pa pagsulod ug pagdula-dula sa pang-hunahuna sa dautang ispirito ngadto sa tawo.
Ikaduha ang demonic oppression diin makita na ang mga pisikal nga senyales sama sa bun-og, samad, pagsuka-suka og mga insekto o ubang gagmayng butang nga nagpamatuod sa pagpanghilabot sa dautang kalag sa tawo.
Ulahi niana ang demonic posession diin kontrolado na sa mga dili ingon nato ang lawas ug sikolohidad sa tawo. Sa kaso sa nahitabo sa Digos City, dili pa mapunting sa bisan unsang ang-ang sa demonic possession ang maong pagsapi.
Apan, kon ugaling mahitabo kini, kinahanglan ang tabang sa usa ka kura paroko o obispo sa pagpahigayon og exorcism rites.
Nagpahibalo sab ang katekista ilabi na sa mga kabatan-onan nga dili magpahigayon og pagpanawag sa mga dautang elemento ingon man ang pagtuo sa bisan unsang mananagna ug horoscope aron dili sab matarog ang ilang pagtuo nga kasagarang hinungdan sa pagsulod sa bisan unsang dautang elemento.
via | Bombo LJF
