DAVAO CITY – Nakakolekta og mokabat sa P2.7 milyones nga multa ang Davao City Police Office (DCPO) human sa usa ka semana nga operasyon nga gitarget ang mga motorcycle drivers ug motorista sa mga kalapasan sa trapiko.
Nasikop sa kapolisan ang 148 ka mga drayber sa motorsiklo sa 239 ka managlahing operasyon batok sa mga bora-bora nga miresulta sa mokabat sa P400,000 nga citation ticket ug temporary operator’s permits.
Gawas niana, siyam ka mga motorsiklo ang na-impound sa susamang panahon.
Nakaisyu sab ang kapulisan og 2,570 ka citation ticket ug P1,300,000 nga multa gikan sa 706 ka operasyon sa Local Traffic Code.
Dugang pa, gilusad sab ang lain pang 174 ka mga operasyon kalabot sa RA 4136 kon Land Transportation and Traffic Code nga miresulta sa 464 ka gipagawas nga TOP nga mikabat sa kapin P985,000.
Gikanayon ni PCapt. Hazel Tuazon, ang tigpamaba sa DCPO nga kinahanglan nilang sumpuon ang pagkuyanap sa bora-bora tungod sa nagkadaghang reklamo sa mga residente.
Matud pa, hingpit lamang nilang gisunod ang direktiba ni Mayor Sebastian Duterte nga hingusgan ang operasyon batok sa bora-bora.
Pangdakpon sab ang mga motorsiklo nga adunay mga exhaust pipes nga mobuga ug tingog nga molapas sa 115 decibel, ug kinahanglang i-dismantle kini sa mga drayber ug pabayron og multa nga P5,000.
via || Bombo LJF
