DAVAO CITY – Gipa-ilalom na sa psychological evaluation ang 14 anyos nga batan-ong lalaki kinsa biktima sa pagpangmolestiya sa 46 anyos nga administrative assistant sa Southern Philippines Medical Center.
Gikanayon ni PSSG Jaquilin Abu, hepe sa WCPD sa Bajada Police station, nga subay sa ilang physical assessment sa biktima nakasinati kini ug pagka-trauma o daw wala kini sa iyang kaugalingon.
Dugang pa ni Abu nga gipa-ilalom na usab sumala pa ang biktima sa assessment sa mga social worker ug sa karon kauban niini ang iyang pamilya alang sumala pa sa dinalian niini nga recovery gikan sa dili maayong nahitabo kaniya.
Sumala pa usab sa maong police official, kagahapong adlawa pormal nang gipasakahan ang suspect ug kasong kalapasan sa section 15 sa republic act number 7610 o Other forms of child abuse.
Giangkon usab sumala pa sa suspect ang panghitabo, apan daw naglibog kini sa pagtubag kung nganong iyang nahimo ang pagmolestiya sa biktima.
Nasayran nga kapin 20 ka tuig nang nagtrabaho ang suspect sa Southern Philippines medical center.
Kahinumduman nga paspas nga misumbong ang biktima ngadto sa iyang igsuon human sa panghitabo hinungdan nga nadakpan usab gilayon ang suspect. Gikabutyag nga usaka out-patient ang biktima sa SPMC ug ang suspect ang nag-aassist kaniya.
