DAVAO CITY – Gitagaan og pagpaklaro ni Maj. Mark Anthony Tito nga wala nila gipabay-an ang mga kanhi rebelde nga wala pa nakadawat sa ilang hinabang ilawom sa Enhanced Comprehensive Local Integration Program kon E-CLIP.
Kahinumduman nga gipaabot ni alyas Marikit kon Arian Jane Ramos nga gihapoy nadawat nga benepisyo gikan sa gobyerno rason nga gihagit niini ang hingtungdan ahensiya nga sulbaron ang suliran ug sitwasyon sa mga kanhi rebelde.
Sumala kang Tito, anaa sa 2,881 ka mga kanhi rebelde ang nalista ilawom sa E-Clip diin 2,461 niini ang nakadawat na og ‘intermediate cash assistance’ nga mibalor og P15K ug anaa na lamang sa 420 ang wala nakadawat.
Dugang pa niini nga kapin dos mil, miabot na sa 1,602 ang nakadawat sa ilang livelihood assistance nga nagkantidad og P50K lakip na niini si alyas Marikit atol sa pagdeklara sa dakbayan isip insurgency-free ug 359 na lamang ka mga kanhi rebelde ang wala pa nahatagan.
Gawas sa kwarta, aduna usab ginatanyag nga livelihood skills samtang ginapahiluna sila sa kasamtangan sa half-way house.
Gani, bisan og adunay isurender nga mga armas, makadawat usab og kwarta ang mga nahisgutan ilawom sa firearms renumeration ug sa 518 ka mga kanhi rebelde, anaa na lamang sa sobra tunga kon 272 ang wala pa nakadawat.
Nalangay lamang ang budget gikan sa national government nga maggikan sa DILG tungod adunay proseso nga ginasunod ug usahay matud pa kang Tito, adunay mga higayon nga naay mga ipausab ug ibalik na pod og pasa sa nahisgutang buhatan.
