DAVAO CITY – Kumpiskado sa CIDG 11 ang nasa P1.1 million nga kantidad sa gituohang smuggled nga mga sigarilyo atol sa gikasang raid sa Maharlika Highway, Barangay Ilang, Davao City niadtong Sabado, Mayo 6.
Naaresto sa maong operasyon ang walo ka tawo lakip ang duha ka mga menor de edad. Giila ang mga dinakpang sila Bensar Abdula Salipsatri, 18 anyos; Ronniel Caballes Buenavista, 19 anyos; Malixander De Leon Imbin, 24 anyos;Al-Zayrin Tayah Samsi, 21 anyos; Jayvan Asamuddin Tayah, 38 anyos; ug Abdulmajid Jumani Araji, 48 anyos, pulos residente sa Muslim Village, Brgy. Ilang, ning dakbayan.
Napalgan sa mga otoridad ang nasa 70 ka mga master cases sa sigarilyo sa dihang gisulayan nila kini og dala sa laing lugar nga walay katugbang nga dokumento.
Himas rehas na ang mga dinakpan sa Bunawan Police Station, samtang gikustodiya na ang duha ka menor sa Women and Children Protection Desk sa maong police station.
Gihikay na ang kasong kalapasan sa RA 10863 kon Customs Modernization and Tariff Act batok sa mga suspek.
via || Bombo LJF
