DAVAO CITY – Nagpadayon pa ang gihimong imbestigasyon labot sa kamatayon sa usaka trabahante ug pagka ospital sa lain pang 3 ka mga kaubanan niini samtang mipahigayon ug internal cleaning sulod sa usaka pipeline sa Barangay Buhangin Proper ning syudad niadtong Abril 21, 2023.
Gikabutyag nga nakasimhot ug kemikal ilalom sa pipe ang 4 ka mga biktima nga sila Jaime Gabutero, Jovan Manayon Tungal, Joshua Guadalupe Villanueva, ug Ryan Marayan Calo hinungdan sa ilang pagkahilo nga miresulta sa kamatayon ni Gabutero.
Samtang gikanayon sa Apo Agua Infrastructura Inc. gisulayan nila sa pagpadangat ug hinabang, apan gibalibaran sumala pa sila sa pamilya sa namatay nga trabahante nga si Jaime Gabutero, 42 anyos.
Samtang gibutyag ni Police Major Catherine dela Ray, spokesperson sa Davao City Police office nga desidido ang pamilya Gabutero nga pasakahan ug kaso ang WITCO Construction & Development Corporation, usa sa mga contractors alang Davao City Bulk Water Supply Project ug maoy employer sa biktima.
Kahinumduman nga una nang mipagawas ug opisyal nga pahayag ang Apo Agua nga nasubo kini sa gidangatan sa mga biktima, ug aksidente ang maong panghitabo diin hugot kining nakiglambigit sa kapulisan sa imbestigasyon sa maong insidente.
Ang Davao City Bulk Water Supply Project ang gilangkuban sa duha ka mga components: diin ang Part A ang gidumala sa Apo Agua nga gikalambigitan sa construction sa Raw Water Intake facilities, Water Treatment Plant, ug Treated Water Pipelines.
Samtang ang Part B ang gihuptan usab sa DCWD, nga gilangkuban sa tapping ug interconnecting sa mga pipes, installation sa mga reservoir ug ang pagbutang sa distribution lines ug ang distribution sa tubig paingon sa mga konsumante ang pabilin ug bugtong dumalahon sa DCWD.
