DAVAO CITY – Gipahingusgan karon ang usa ka kampanya sa Davao City nga nag-awhag sa mga mamalitay sa mga pampublikong merkado nga mugamit og bayong.
Gitawag kining “Bayong-kerohan”, usa ka inisyatibo nga gipangunaghan sa Communication students sa Ateneo de Davao University, nga suportado sab sa City Government of Davao.
Nagtumong ang maong kampanya nga maedukar ang mga mamalitay mahitungod sa perwisyong hatud sa single use plastic ug ang paghulip niini ngadto sa bayong isip nag-unang pamaagi aron mamenosan ang basura nga nagkatag sa palengke partikular na diha sa Bangkerohan Public Market.
Sumala kang Ma. Cecilia Rodriguez, ang Focal Person sa Bayong-kerohan Campaign, tumong sab nga ipasabot sa katawhan ang RA 9003 or the Eco-Waste Management Act ug ang epekto sa paggamit og single use plastics.
Sumala pa, naga-generate ang dakbayan og gikan 600 ngadto sa 250 tons sa basura adlaw-adlaw. Gipromotar sab sa maong kampanya ang paggamit og bayong nga usa sa mga environment-friendly nga pamaagi aron mamenosan ang paggamit sa plastic bags sa tanang palengke sa dakbayan.
Una nang gilusad ang kampanya sa palengke sa Bangkerohan Public Market ug nagpadayon gihapon ang pagpakaylap og kasayuran mahintungod sa recycling ug proper waste disposal.
via || Bombo LJF
