DAVAO CITY – Gitaktak na sa listahan ang anaa sa lapas baynte tres mil ka mga benepisyaryo sa Pantawid Pamilyang Pilipino Program kon 4Ps sa DSWD.
Gikanayon ni Margie Cabido, 4Ps Division Chief, nasa 23,009 ka mga pamilya ang gikonsiderang non-poor gumikan sa mga namatikdang pag-usab sa kinabuhi sa mga benepisyaryo gikan sa mga nagkandaiyang interbensyon nga gihatag sa buhatan ug uban pang ahensya ngadto kanila.
Dugang pa, una na silang giklasipika isip poor una pa man mahilakip sa programa.
Matud pa sa opisyal, gikonsiderang poor ang usa ka pamilya nga gilangkuban sa lima ka mga myembro kon magbaton lang kini og income nga ubos sa P11,000, gawas sa ubang sumbanan sama sa pagpangempleyo, balay, tubig, kuryente, kabtangan sumala sab sa nakabutang sa ilang household assessment form.
Tumong sa buhatan nga makaabot og 284,166 ka mga 4Ps beneficiaries gikan sa Davao Region karong katapusan sa tuig 2023.
Nanukad na ang validation sa mga benepisyaryo ug magpadayon kini una pa matapos ang tuig.
via || Bombo LJF
