DAVAO CITY – Nanawagan karon ang Davao City Police Office (DCPO) ngadto sa tanang lisensyadong gun holders nga pasulod sa Davao Region nga i-deposito ang ilang mga pusil o armas sa mga border checkpoints gumikan sa implementasyon sa gun ban nunot sa ipahigayon nga Alveo Ironman 70.3 triathlon.
Suma sa tigpamaba sa buhatan nga si PMaj. Catherine Dela Rey nga una na gipatuman ang suspensyon sa Permit to Carry Firearms Outside Residence (PTCFOR) human giaprubahan kini sa PNP National Headquarters niadtong Lunes. Suma ni DelaRey nga gi-request na sa Police Regional Office XI nga mupatuman og gun ban sa tibuok rehiyon aron malikayan ang bisan-unsang krimen dunay kalabotan sa firearms.
Gikanayon usab sa opisyal nga buot lamang masiguro sa kapulisan ang kaluwasan sa mga atleta nga musalmot sa nasangpit nga International Triathlon Competition. Mulungtad ang gun ban hangtud katapusan ning bulana.
