DAVAO CITY – Nakasinati og tumang kahadlok ang mga residente sa New Bataan diin napalgan ang episentro sa duha ka magnitude 5.9 nga linog sa Davao de Oro.
Sa pakighinabi sa Bombo Radyo Davao kang New Bataan MDRRMO Officer Lynne Dollolasa, lab-as pa sa panumduman ang mga nahitabo kaniadtong unang pagtay-og sa yuta niadtong Pebrero 1 diin gatusan na sab ka mga balay og gambalay ang hilabihang nangaguba.
Sukad pa nahitabo ang unang pagtay-og bandang alas-2 sa hapon, gipangulbaan na sa mga indibidwal ang pagbalik sulod sa ilang mga panimalay ug nakahukom nga mugawas na lamang aron layo sa disgrasya.
Sumala pa sa pagbanabana sa munisipyo, anaa sa 190 ka mga pamilya og anaa sa 300 ka mga indibidwal ang gipanghikiling sa mga evacuation areas partikular na sa Barangay Andas, New Bataan.
Nagpahigayon gihapon og evacuation sa mga apektadong pamilya sa lungsod, ug giandaman na sab sa lokal nga kagamhanan ang mga pamilya nga naapektuhan.
Hinuon, gipasalamatan nila nga naunang nagpagawas og suspension order ang LGU sugod pa kagahapon maong walay mga estudyante ang nangaangol. Padayon pang ginasubay sa buhatan ang kinatibuk-ang damyos sa nahitabong linog sa lungsod sa New Bataan.
Sumala sa PHILVOLCS, nakasinati og kinse ka higayon nga pag-tay og ang New Bataan. Pagka alas-4:43 sa hapon, subling nasinatian ang magnitude 5.9 sa New Bataan gihapon. Notado ang New Bataan ug ang Maragusan isip lugar sa Seismic Activity diin namatikdan ang mga paglihok-lihok sa yuta ilalom niini.
via || Bombo LJF
