DAVAO CITY – Taliwala sa kalingawan sa natigayong unang Araw ng Dabaw Music and Arts Festival kagabii, gikadismaya sa 80,000 ka mga manan-away ang posponement sa ginaatngang 3D Drone Light Show sa Bago Aplaya Coastal Road ning dakbayan.
Niapela sa katawhan ang organizer nga si Kat Dalisay nga palungon ang mobile data sa mga cellphone tungod ma-intercept sa mga drones ang signal sa ilang mga mobile data.
Dugang pa, nagkinahanglan og nasa 14% nga signal strength alang sa mga drones aron makalupad sa kawanangan, apan miabot lamang kini sa 12% niadtong tungura.
Gipaklaro hinuon ni Dalisay nga dili kanselado ang drone show apan hinuon madelatar pa una kini hangtud adunay makuha nga maayong signal ang mga drones. Nangayo na lamang ug dispensa ang mga organisers tungod sa nahitabong aberya sa programa.
Tungod niini, subling ipadayon ang laing hugna sa 3D Drone Light Show ugma sa gabii. Bisan pa man temporayong gihunong ang drone show nga usa sa mga highlights sa programa, gidagsang gihapon sa mga manan-away ang konsyerto tungod sa pagtugtog sa mga lokal ug ilado nga mga DJs ug banda.
