DAVAO CITY – Gibisita ni Senator Sherwin Gatchalian ang mga apektadong residente sa nahitabong sunog sa Barangay 21-C ug 22-C, Piapi Boulevard, Davao City kagahapon.
Nasayod ang senador sa kalisdanan nga kasamtangang nasinatian sa mga residente atol sa iyang pakighinabi na sab sa mga residente sa evacuation center duol sa ground zero sa nahitabong sunog.
Gikanayon ni Senator Gatchalian nga kon mamahimo, magmugna ang matag barangay og mitigating measures ug fire marshalls panahon sa dagkong sunog aron muresponde sa pagpugong sa pagkuyanap sa sunog.
Sanglit, sagad sab mahitabo kini sa mga nasunog nga lugar ilabi na sa kauluhan nga tungod sa kakipot sa mga lugar, naglisod na sa pagresponde ang mga bumbero.
Atol sa pagbisita sa senador, dala niini ang kapin usa ka milyon ka piso nga ayuda sa mga nasunugan nga iyang gipang-apud apud sa duha ka mga barangay.
Dungan sa pagkaon, nag-apud apud sab ug pinansyal nga hinabang ang opisina sa senador ngadto sa mga residente aron makatukod na sila og balik sa ilang mga panimalay.
Sumala sa Davao CSWDO, anaa sa 653 ka mga pamilya sa Barangay 21-C; ug 336 ka mga pamilya sab sa Barangay 22-C ang apektado sa sunog.
Gipaningkamutan na sa buhatan ang validation sa mga pamilya nga nabiktima aron mahatag na sa dayon ang ilang financial assistance.
via || Bombo LJF
