DAVAO CITY – Gikabutyag nga ang bulan sa Marso mao ang usa sa pinakainit nga bulan sa tibuok tuig ug sinugdanan sa pagsugod sa summer season sa Pilipinas.
Gawas pa niini, ang nahisgutang bulan ang nagbaton usab ug pinakadaghang sunog nga nahitabo subay sa datos nga gipagawas sa Bureau of Fire Protection (BFP).
Gumikan niini, gipanghinaot nga mokunhod pa ang sunog nga mahitabo sa bulan sa Marso gumikan kay usa ka fire prevention month ang nahisgutang bulan.
Samtang kung kahinumduman, pinaagi sa Proclamation No. 115-A nga gipirmahan kaniadto ni kanhi Pangulong Ferdinand E. Marcos Sr., lakip na ang Proclamation No. 360 niadtong tuig 1986, gideklara ang bulan sa Marso isip “Fire Prevention Month” or “Burn Prevention Month.”
Sa pikas bahin, sa pakighinabi sa Bombo Radyo Davao kang SFO4 Ramil Gillado, tigpamaba sa Davao City Fire District, gikanayon niini nga responsibilidad sa tanan ug dili lamang sa kabomberohan ang paglikay sa sunog ug ang pag-amping magsugod gayud sa tagsa-tagsa ka mga panimalay.
