DAVAO CITY – Nagpahimangno ang Philippine Dental Association ngadto sa mga katawhan nga mag-igmat sa mga ginadangop nga dentista gumikan sa nagkatag nga mga nagpaka-aron ingnong dentista lakip na mga klinika.
Sa pakighinabi sa Bombo Radyo Davao kina Dr. Maria Veronica Quimpo, Executive Vice President sa PDA – Davao City Chapter; ug Dr. Josephine Medel Robertson, Chairman on Campaign Against Illegal Practice sa ahensya, ubay-ubay na ka mga Dabawenyo ang nabiktima sa mga fake dentists nga nagapahigayon og mga operasyon lakip na ang pagpataod og DIY braces sa ngipon.
Matud pa, kinahanglang sutaon ang legitimacy sa dentista pinaagi sa mga certificates ug credentials nga ginasab-it sa opisina, lakip na ang professional license gikan sa PRC.
Kasagaran sa mga dentista, nagapahigayon og operasyon sa mga dental clinics ug dili sa gawas sa klinika o bisan asang lugar, gawas lamang sa mga dental check-ups.
Posible nga mapahamtangan og silot sa balaod ilawom sa Republic Act 9484 o Philippine Dental Act of 2007 ang mga nagpaka-aron ingnong dentista nga katugbang ang multa gikan P200,000 hangtug P500,000 lakip na pagkapriso gikan 2 hangtud 5 ka tuig.
Nagpahibalo sab ang mga dentista mahitungod sa risgo sa pagpataod og DIY braces sa kinatibuk-ang panglawas sa tawo gumikan sa mga ginagamit nga kagamitan nga dili limpyo, dili makatarunganon ang paggamit ug mapalit lamang online.
Peligroso matud pa ang mga pagpataod sa mga kilid-kilid sama sa mga gikatahong kaso dinhi sa dakbayan nga ginadangop ngadto sa ahensya.
Nag-ahwag karon ang Philippine Dental Association subay na sab sa paghinumdum sa National Dental Health Month nga batasanon ang pag-adto sa mga lisesyado ug kasaligang dentista alang sa saktong pag-atiman sa mga ngipon.
via || Bombo LJF
