DAVAO CITY – Gihikling kaganihang alas 3:15 sa kadlawon ang anaa sa 306 ka mga pamilya o katugbang sa 887 ka mga indibidwal sa mga tulonghaan sa Barangay Maa ning syudad gumikan sa kusog nga pagbundak sa ulan nga miresulta sa pagbaha ug pagsaka sa level sa tubig sa kasapaan.
Subay sa datos, anaa sa 132 ka mga pamilya o 430 ka mga indibidwal ang gihikiling sa Maa National High School samtang 174 ka mga pamilya o 457 ka mga indibidwal usab ang anaa karon sa Escoda Elementary School. Sa kasamtangan, nagpabilin pa karon ang mga apektado nga mga pamilya sa evacuation center.
Samtang, nakasinati sab og pagbaha ang mga residente nga nahimutang sa Jade Valley ning siyudad gumikan mi-apaw ang tubig gikan sa Davao River, diin kagabii nagpahigayon og pre-emptive evacuation ang otoridad alang sa mga residenteng apektado sa maong pagbaha.
Lakip na usab nga gibaha ang Damosa area sa may Lanang ning dakbayan, SASA, Barangay Tibungco ug Barangay Bunawan gumikan sa epekto sa weather system nga localized thunderstorms. Samtang sa pikas nga bahin, tungod na sab sa sagunson nga pag ulan, nahugno ang NABOC BRIDGE sa Monkayo, Davao de Oro.
Hinuon, walay natala nga naangol sa pagkahugno tungod wala na kini gipaagian gumikan namatikdan nga huyang na kini. Nakabantay sab gilayon ang mga opisyales sa barangay ug mga CAFGU aron masiguro nga dili maagian ang maong tulay ug giabisohan ang tanan nga naga-agi sa maong tulay nga gamiton ang alternatibo nga rota sa may Barangay Babag via Inambatan paingon sa Barangay Olaycon.
