DAVAO CITY – Laraw sa City Social Welfare and Development Office (CSWDO) nga lugawayan nila ang pag-apod-apod og mga food packs ngadto sa mga draybers kinsa wala nakadawat og fuel subsidy ug irehistro kadtong wala pa sa listahan alang sa High Priority Bus System social packages.
Sumala ni CSWDO focal person for community ug HPBS nga si Mae Aquino, muabot sa kinatibuk-ang 1,862 PUJ ug taxi drivers ang wala nakadawat og fuel subsidy gikan sa Department of Social Welfare and Development (DSWD) nga target sa buhatan makadawat og food packs. Kaniadtong Pebrero 16 ngadto sa Pebrero 17, una na mipahigayon ang CSWDO og pag-apod-apod og mga food packs ngadto sa mga draybers diin 464 ka mga drayber ang nakadawat og food packs nga dunay unod sa 20 ka mga canned goods ug lima ka kilo sa bugas.
Sumala ni Aquino, ang mga wala nakadawat og subsidy kabahin unta sa Batch 12 nga hatagan og financial assistance kaniadtong 2022 , apan gumikan sa kakuwangon sa pondo wala kini nahatagan sa DSWD. Busa gipaningkamotan sa buhatan nga makadawat gihapon ang mga nahisgutan pinaagi sa mga food packs. Sumala ni Aquino nakig-koordinar usab sila sa City Mayor’s Office alang sa mga food packs nga susuma sa madawat sa ubang sector, nakadawat usab karon ang mga taxi drivers ug mga PUJ drivers, diin matag drayber nakadawat og tig-duha ka mga food packs.
Gawas sa pag-apod-apod og mga food packs, dul-an 100 usab ka mga draybers ang narehistro alang sa HPBS. Taliwala sa inisyal nga schedule sa food packs distribution, laraw nila kining i-extend hangtud tanang draybers nga anaa sa listahan makadawat og mga hinabang gikan sa gobyerno.
