DAVAO CITY – Gilusad na sa Agdao Public Market ang PalengQR nga usa ka digital payment system nga mamahimong gamiton sa mga mamaligyaay sa merkado aron magbayad pinaagi sa cashless method.
Atol sa paglusad niini kagahapon, ubay-ubay ka mga tindera sa Agdao Public Market ang nahatagan ug mga katin-awan mahitungod sa cashless payment method gikan sa Bangko Sentral ng Pilipinas, samtang naghatag sab og lektyur ang mga sakop sa Department of Information Communications Technology kon DICT mahitungod sa cybersecurity.
Nakahigayon sab ug pagparehistro sa mga digital finance app ang mga manindahay alang sa pag-open ug ilang kaugalingong account.
Matod pa kang City Economic Enterprise Market Supervisor Gerardo Antonio Castillo, bisan pa man sa dili pagkapamilyar sa uban ning maong pamaagi sa pagbayad, ubay-ubay na sab ang nagagamit niini tungod sagad kining ginapangita sa mga mamalitay sa merkado.
Aduna nay 900 ka mga mamaligyaay ang nakaparehistro na, ug 40 ngadto sa 50 ka mga tindahan ang nagadawat na og digital payment option alang sa PalengQR.
via || Bombo LJF
