DAVAO CITY – Nagpahimangno ang Davao City Police Office ngadto sa mga tag-iya sa hotels ug inns sa dakbayan nga mudawat og menor de edad nga manag-uyab o bisan usa lamang niini ang menor de edad nga mag-check in atol sa Valentine’s Day karong Pebrero 14.
Sumala sa tigpamaba nga si PMaj. Catherine Dela Rey, mamahimong mapasakaan og kasong kriminal ug uban pang bug-at nga kaso ug dunay posibilidad nga matanggalan pa kini og business permit kon musupak kini sa maong balaod.
Gikinahanglan usab nga mupresenta ang tanang kustomer og identification card ug ubang pang mga dokumento nga nagapamatuod nga anaa kini sa saktong pangidaron aron kini tugutan nga maka check-in.
Kini nga lakang aron makunhoran ang nagasakang kaso sa unwanted teenage pregnancy sa Davao City.
Sa datos nga gipagawas ni CHO population division head Jerrielyn Lewis, anaa sa 2,925 ang mga kaso sa sayo nga pagmados dinhi sa dakbayan nga gilangkuban sa kinse hangtud dyise nuwebe anyos nga pangidaron.
Samtang, subay na sab sa datos sa Commission on Population kon POPCOM, nasa 9,500 ang natalang teenage pregnancy cases sa tibuok Davao Region diin nahisakop ang mga namabdos gikan sa diyes anyos ngadto sa dyise nuebe anyos ang pangidaron.
Base sa Republic Act 11648 nga gipatuman kaniadtong Marso 2021, ang pagpakighilawas sa usa ka tawo nga ubos sa 16 anyos usa kini ka krimen nga gikonsidera nga statutory rape gawas lamang kon menor de edad usab ang nakighilawas.
via || Bombo LJF
