DAVAO CITY – Gihatud na sa ulahing kapahulayan niini si Ana Mae Talili, 21 anyos nga biktima sa nahitabong hit-and-run niadtong nakalabay nga Enero 26 sa dalang Mc Arthur Highway ning dakbayan sa Davao.
Dagsa ang pahasubo ngadto sa pamilyang Talili ug napuno og pagdanguyngoy ang lubong sa dalaga diin makita gayud nga halos mapuno og tao ang simbahan ug daghan usab ang mihatud sa lubong ni Ana Mae nga gilangkuban sa iyang mga kabanay, higala, classmates ingon man usab mga magtutudlo.
Gilubong si Ana Mae sa Mt. Apo Garden Cemetery, Riverside sa Calinan ning syudad.
Kahinumduman nga Enero 26 sa tungang gabii sa dihang nahitabo ang disgrasya nga gikamatay ni Ana Mae.
Nalambigit sa maong insidente ang usa ka puti nga pick up nga gimanehoan sa usa ka Jester Yucosing, 40 anyos.
Nasayran sab nga ang maong sakyanan ang gipanag-iyahan sa bise mayor sa Boston, Davao Oriental nga si John Paul Lampig.
Human sa paghatud kang Ana Mae sa iyang ulahing kapahulayan, asikasohon na sa pamilyang Talili sa umaabot nga adlaw’ng Lunes ang pagpasaka og kaso ngadto kang Yucosing.
Gikatakdang mag-atubang ang nahisgutan og kasong reckless imprudence resulting to homicide, physical injury, and damage to property.
Sa pikas bahin, posible sab nga mag-atubang og silot si Vice Mayor Lampig tungod sa pagpanag-iya sa maong puti nga pick -up.
Bisan paman nga aduna nay misurender nga responsable sa maong panghitabo, singgit gihapon sa kabanay ni Ana Mae ang tinoud nga hustisya.
Via || Bombo Alyan Ferandos Silao
