DAVAO CITY – Nanawagan ang mga pipila ka mga grupo sa Davao City ngadto sa Japan International Cooperation Agency kon JICA nga hawanan na ang ilang interes ngadto sa pagatukurong waste-to-energy kon WTE facility sa dakbayan.
Sumala pa sa pipila ka mga grupo, makaapekto ang maong pasilidad dili lamang sa kahimsog sa katawhak. Kon dili, makapatay sab kini sa mga lawak pang-agrikultura nga mamahimo pang mapahimuslan sa komunidad.
Sumala pa ni Mark Peñalver, executive director sa Interfacing Development Interventions for Sustainability kon IDIS-Davao, makadaot sa kinaiyahan ang maong proyekto nga sagad dili renewable o sustainable nga pagakuhanan ug kuryente sa dakbayan.
Ginabawal sab sa balaod ang incineration kon pagsunog sa mga basura isip pamaagi sa WTE nga magmugna og kuryente subay na sab sa Republic Act No. 9003 kon Ecological Solid Waste Management Act ug Republic Act No. 8749 kon Philippine Clean Air Act of 1999.
Pipila sab ang nagaingon nga dili matud pa financially viable project alang sa JICA, mga pampubliko ug pribdong sektor sa Davao City ang maong proyekto.
Kahinumdumang giapurubahan ning nakalabayng tuig sa City Government of Davao ang maong P2.5 billion WTE facility nga gipundohan sab sa gobyerno sa Japan nga nakitang pamaagi aron mapahimuslan ang mga nagpundok nga basura sa mga dumpsite.
Ipatukod ang maong WTE facility sa 10 ektaryas nga luna sa Barangay Biao Escuela, Tugbok District, ning dakbayan.
via || Bombo LJF
