DAVAO CITY – Gipasigarbo sa Task Force Davao ang ilang mga nahimong kalampusan sa tuig 2022. Gibutyag ni Task Force Davao Commander Colonel Darren Comia nga nahimong hingpit ang kasundaluhan sa pagbantay sa mga utlanan sa dakbayan nga nagresulta sa pagkakumpiska sa mga kontrabando ug ang pakasikop sa mga indibidwal nga nagahupot niini.
Sumala sa gipagawas nga datos, nasa dul-ang P16 million ang nakumpiska niining mga kontrabando gikan pa sa tunga-tunga sa tuig 2021 hangtud sa kasamtangan; samtang 185 ang nasilutang mga indibidwal. Anaa sa 113 ka mga dinakpan sab ang nalambigit sa paghupot og ilegal nga mga armas.
Nakapahigayon sab ang kasundaluhan og mga kampanya batok terorismo aron mapasibaw ang culture of security dinhi sa tibuok dakbayan.
Usa sab sa mga kalampusan ang pagpatuman sa Executive Order No. 62 kon ang pagmugna og integrated response on terrorism plan o mas giilang USAHAY II, ug ang pagpaigmat sa mga security forces ilabi na sa panahon sa hulga sa seguridad; nga gaprubahan ni kanhi Davao City Mayor ug Vice President Sara Duterte.
Hinungdan niini ang pagpahigayon og mga simulation exercises upat ka beses sa usa ka tuig aron mabansay ang mga security forces dinhi sa dakbayan sa natad sa pagtubag sa krisis pang-seguridad.
via || Bombo LJF
