DAVAO CITY – Giaprubahan sa lokal nga panggamhanan sa Davao City ang P11.8 billion nga budget alang sa tuig 2023.
Subay sa pagbahin-bahin sa pondo, P700 million ang mupadulong sa mga sanitary projects sa City Environment and Natural Resources Office kon CENRO; P800 million alang sa mga programa sa kahimsog sa City Health Office; ug P3 billion alang sa mga programa ilawom sa City Mayor’s Office.
Samtang 20 porsyento niini ang mupaingon sa mga programang imprastraktura sa dakbayan.
Gikanayon ni Davao City Committee on Trade, Commerce and Industry chair ug 1st District Councilor Bernie Al-ag nga gamiton ang maong pondo sa mga importanteng proyekto nga ipahigayon sa dakbayan, lakip na ang pagahimoong meetings, incentives, conventions, exhibitions kon MICE Conference nga gigahinan ug P10 million.
Dugang pa ni Councilor Al-ag nga dagko ang mamahimong tabang sa maong convention aron makaaghat sa mga organizers nga magpahigayon ug mga dagkong kumperensiya alang sab sa pagpalambo sa turismo sa dakbayan.
Una nang gikumpirma ni City Tourism Operations Officer-in-Charge Jennifer Romero nga duna nay nakahan-ay nga mga kalihukan alang sa ipahigayong MICECon sunod tuig atol sab sa pagsaulog sa Araw ng Dabaw nga parehong ilusad human sa kapin duha ka tuig nga pagkahunong gumikan sa pandemya.
via Bombo LJF
