DAVAO CITY – Gitay-ug og Magnitude 5.9 nga linog ang Davao Region kaganinang alas-04:01 sa kaadlawon diin natala ang episentro 37 kilometers habagatan sidlakang bahin sa Governor Generoso, Davao Oriental.
Gikatala ang Intensity 2 sa may Kidapawan City, Makilala, ug Arakan, Cotabato; Tupi ug General Santos City, sa South Cotabato.
Sigun sab sa natalang Instrumental Intensities gikan sa buhatan, nasinati ang Intensity 4 sa Kidapawan City, Cotabato; Don Marcelino, Davao Occidental; ug Malapatan, Sarangani.
Samtang Intensity 3 sa may Nabunturan, Davao de Oro; Kiamba, Maasim, ug Glan, Sarangani; Koronadal City, Tampakan, Tupi, Polomolok, ug General Santos City, sa South Cotabato.
Nasinati ang Intensity 2 sa Maitum, Sarangani; T’Boli, South Cotabato; ug Columbio, Sultan Kudarat.
Intensity 1 sa Kalilangan, Bukidnon; Suralla, Tantangan, Norala, ug Santo Niño, South Cotabato.
Sa pikas bahin, nabati sab sa dakbayan sa Davao ang kusog nga pagtay-og sa yuta diin pipila ka mga indibidwal ang nanggawas sa tagsa-tagsa ka mga panimalay.
Aduna sab natandog nga poste sa kuryente atol sa panghitabo diin midilaab kini. Hinoon, walay natala ang Davao City Disaster Risk Reduction and Management Office nga kadaut ingon man wala say natalang na-angol sa maong linog apan padayon nga gipanubayan pa ang posibleng mga damyos nga hatud niini.
via || Bombo LJ Florendo
