DAVAO CITY- Padayon ang pagdawat sa lokal nga panggamhanan sa Davao pinaagi sa City Social Welfare and Development (CSWDO) og donasyon alang sa mga naapektohan sa Bagyong Paeng.
Kahinumduman, labing naigo sa maong bagyo ang Bangsamoro Autonomous Region in Muslim Mindanao (BARMM) niadtong Oktobre 29 diin naapektohan ang anaa sa 115,437 ka pamilya o 572,185 ka mga indibidwal gikan sa 126 ka mga barangay.
Una nang naghatud ang Davao City og duha ka teams aron mag-deliver sa unang hugna sa ayuda ug relief goods sa Maguindanao ug Cotabato City niadtong nakalabay nga mga adlaw.
Usa ka team nga gilangkuban sa 44 ka mga indibidwal ang gideploy sa Cotabato City samtang usa ka team nga gilangkuban sa 90 ka mga indibidwal ang gideploy sa Maguindanao aron mutabang sa nagpadayon nga search and rescue operations.
Ang nahisgutang team ang gilangkuban sa mga social workers, emergency responders, security forces, ug medical personnel gikan sa Emergency Medical Services sa City Disaster Risk Reduction and Management Office, Fire Auxiliary Services, Urban Search and Rescue, City Health Office, City Social Welfare and Development Office ug uban pa.
