DAVAO CITY- Gihatagan ang lokal nga panggamhanan sa Davao og ISO 9001:2015 Quality Management System (QMS) accreditation sa usa ka inspection and certification services group nga SOCOTEC niadtong adlaw nga Biyernes.
Ang ISO 9001:2015 usa ka global standard nga gitakda sa International Organization for Standardization nga nagtino sa gikinahanglang rekisitos alang sa lig-on nga Quality Management System, proseso ug programa nga kinahanglang i-develop, ipatuman ug i-mintina sa usa ka organisasyon alang sa malampusong pagdumala sa usa ka produksyon o paghatud og serbisyo.
Epektibo kini sulod sa tulo ka tuig ug magamit sa tanang departamento sa lokal nga panggamhanan ug mga satellite offices.
Sukad sa pag-adapt sa standard niadtong nakalabay nga tuig, malampuson nga nakab-ot sa lokal nga panggamhanan sa Davao ang mga specifications nga gikinahanglan sa ISO 9001:2015 sama na lamang sa pagpahapsay sa mga operasyon pinaagi sa digitalization ug organization reengineering, pagpasayon sa service delivery, human resource trainings, practice of public health standards ug uban pa.
Gipahigayon ang awarding of ceremony sa City Hall diin gitambungan kini ni Davao City Mayor Sebastian “Baste” Duterte, Chief of Staff ni Vice President Sara Duterte ug kanhi Davao City Administrator Atty. Zuleika Lopez, Vice Mayor J. Melchor Quitain Jr., QMS Committee Leader Atty. Sarah Phoebe Paclibar, SOCOTEC Operations Director Gilmore Rivera, mga City Department Heads, mga hepe sa nagkadaiyang buhatan ug uban pang mga public officials.
VIA|| Allianne Ferandos Silao
