DAVAO CITY- Gidagsa sa daghanang mga bisita ug mga negosyante ang Davao Agri Trade Expo 2022 nga gipahigayon sa SMX Convention Lanang sukad pa kagahapon, Setyembre 29 ug matapos usab ang pagpahigayon sa nahisgutang aktibidad karong adlawa, Setyembre 30.
Daghang mga raffle ug pahalipay sab ang gi-andam sa mga nagkalain-laing negosyante karong adlaw alang sa mga musalmot.
Sa pikas bahin, gipasigarbo ug gihatagan og bili ni Senador Cynthia Villar nga ang Davao City gideklara isip chocolate capital ug ang Davao Region isip cacao capital sa nasud kaniadtong 2021.
Sumala pa niini nga kini usa ka pag-ila sa pinakadakong producer sa cacao sa nasud ug sa mahinungdanong kontribusyon niini sa paghimo sa Pilipinas nga inila ug ginapangita sa mga chocolate maker ilabi na ang mga nasud US, Japan ug Europe.
Base sa pinakabag-ong datos gikan sa Philippine Statistics Authority (PSA), ang Davao Region makahimo sa pagproduce og 78.76% sa tinuig nga produksyon sa cacao sa nasud.
Sa katapusan, gihatagan usab og importansya ang cacao nga maoy nagahatag og panginabuhian sa mga mag-uuma sa kabukiran aron magarantiya ang pagpadayon sa industriya sa cacao sa nasud partikular na sa Davao aron masiguro ang food security, oportunidad sa pagpanarbaho ug aron adunay maayong kita ang katawhan.
