DAVAO CITY- Gadawat na ang Mount Apo Natural Park (MANP) og mga mountaineer o mga indibidwal nga buot musaka sa Mt. Apo. Kini mismo ang gikanayon ni Julius Paner, opisyal sa Sta. Cruz Tourism sukad nga giablihan sa publiko ang maong bundok niadtong Setyembre 1.
Sagad sa mga trekker ang gikan pa sa langyaw nga mga kanasuran sama sa Australia, Germany, New Zealand, Singapore, South Africa, Thailand ug United States.
Sumala ni Paner, ang Mt. Apo gayud ang nagsilbing magnet sa Davao Region ilabi na sa foreign market diin mao matud pa kini ang nag-unang asset sa rehiyon kung hisgutan ang outdoor activity.
Kahinumduman nga niadtong bulan sa Hunyo, gisugdan ang tulo ka bulan nga off season sa Mt. Apo diin subay kini sa resolusyon sa MANP-Protected Area Management Board.
Sa nahisgutang panahon, ginadili gayud ang tanang trekking ug camping sa mga trail sa sulod sa Davao Region alang sa off-season period.
Kini isip paghatag og dalan sa rehabilitasyon sa bundok ingon man aron dili masamok ang mga fauna species sa maong natural park aron mahatagan kini og panahon aron managhan.
Kahinumduman nga ang Mt. Apo maoy pinakataas nga bundok sa nasud Pilipinas. Sa pikas bahin, gikumpirma usab ni Paner nga gikan Lunes hangtud adlaw nga Huwebes, anaa lamang sa 35 ka mga mountain climbers ang tugutan samtang gikan Biyernes hangtud adlaw nga Dominggo, anaa sa 50 ka mga mountaineers ang mamahimong musaka sa maong bundok.
